Тургун президентке: Атамбаев берген медалды Жээнбеков жокко чыгарды, а сиз пенсиямды көтөрүп берсеңиз

Президент Садыр Жапаровго Ат-Башы районунун тургундары менен болгон жолугушуусунда Большевик айылынын Рахатбек аттуу тургуну кайрылды. 

Ал 1-топтогу майып экенин, 3 баласын чоңойтуп жаткан жалгыз бой ата экенин жана 2010-жылы кырсыкка учурап, баспай калганын билдирди. 

“Мен 14 миң пенсия алам. Атамбаев 2016-жылы “Даңк” медалы менен сыйлаган, бирок ага эч кандай пенсия чектелген эмес. Андан кийинки президент медалымды жокко чыгарып салган”, – деди ал. 

“Биринчиси көңүлүңүздү алса, кийинкиси жокко чыгарып салыптыр да”, – деп күлдү президент. 

“Үчүнчүсү сизсиз, көңүлүмдү көтөрүп пенсиямды жогорулатып берсеңиз”, – деп суранды тургун. 

Президент пенсияны көбөйтүү анын укугу эместигин айтып, Соцфонддун өкүлүнө эгерде мунун мыйзамдуу жолдору болсо карап берип коюуну тапшырды.