Бишкекте мас абалында унаа башкарган милиция кызматкери иштен алынды

Мурда мас абалында унаа башкарганы үчүн кармалган милиция кызматкери ички иштер органдарынан расмий түрдө бошотулду. Бул тууралуу 14-апрелде Бишкек шаарынын Ички иштер башкы башкармалыгынын басма сөз кызматы билдирди.

Окуя 10-апрелде болгон. Кызматтык текшерүүнүн жүрүшүндө унааны Бишкек шаарынын Октябрь райондук ИИБине караштуу ГОМ-4 бөлүмүнүн нөөмөтчү инспектору, милициянын улук лейтенанты С.С. башкарып баратканы аныкталган.

Алкоголь колдонгону медициналык күбөлөндүрүүнүн жыйынтыгы менен тастыкталды.

Бишкек ШИИББ мындай жүрүм-турум кызматтык тартипти одоно бузуу болуп саналарын, ички иштер органдарынын кадыр-баркына шек келтирип, алардын аброюна доо кетирерин белгиледи.

Кызматтык иликтөөнүн жыйынтыгында аталган кызматкерди Кыргыз Республикасынын ички иштер органдарынан бошотуу чечими кабыл алынды.