Эң кымбат азык-түлүктөр кайда: Караколдо нан жана эт, Ошто сүт

Монополияга каршы кызмат 2026-жылдын 28-майына карата социалдык маанидеги товарлардын баасына жүргүзүлгөн жумалык мониторингдин жыйынтыгын жарыялады. Талдоо өлкө аймактарындагы азык-түлүк жана күйүүчү май бааларында олуттуу айырмачылыктар бар экенин көрсөттү.

Негизги азык-түлүк товарлары боюнча эң кымбат шаарлардын бири кайрадан Бишкек болду. Бул жерде биринчи сорттогу жергиликтүү буудай уну эң жогорку баада — килограммы 47,5 сомдон сатылууда. Ал эми Ошто анын баасы 33 сом, Таласта 32 сомду түзөт. Борбор калаада импорттук ун дагы эң кымбат болуп, килограммы 55 сомго жеткен.

Ошол эле учурда формовой нан эң кымбат Баткенде сатылууда — килограммы 84,3 сом. Салыштыруу үчүн, Бишкекте анын баасы 62,5 сомду түзөт. Тандыр нан болсо Караколдо кымбаттап, килограммы 113 сомго жеткен.

Сүт азыктары боюнча дагы бааларда олуттуу айырмачылык байкалат. Эң кымбат пастеризацияланган сүт Ош шаарында сатылып, литри 105 сомду түзгөн. Ал эми Нарын менен Токмокто анын баасы 75–76 сом деңгээлинде кармалууда.

Эттин баасы боюнча Каракол алдыга чыкты. Бул жерде кой эти килограммы 790 сомдон сатылса, сары майдын баасы 767,5 сомго жеткен. Мындан да жогорку баа Таласта катталып, сары майдын килограммы дээрлик 795 сом болгон.

Жашылчалардын ичинен эң кымбат сабиз Караколдо сатылып, килограммы 55 сомду түздү. Ал эми эң арзан пияз Жалал-Абадда — 17 сомдон сатылууда. Бишкекте болсо пияздын баасы 42,5 сомго жеткен.

Мониторинг күйүүчү майдын баасындагы айырмачылыктарды дагы көрсөттү. Эң кымбат АИ-92 үлгүсүндөгү бензин Баткенде катталып, литри 81,9 сом болду. Андан кийинки орундарда Ош жана Жалал-Абад турат. Эң арзан бензин Токмокто сатылып, баасы 76,1 сомду түзгөн.

Дизелдик күйүүчү май дагы түштүк аймактарда кымбатыраак болууда. Баткенде дизелдин литри 94,2 сом болсо, Ошто 94 сомду түздү. Салыштыруу үчүн, Токмокто анын баасы 84,7 сом деңгээлинде.

Эксперттердин айтымында, товарлардын баасына логистика, аймактардын алыстыгы, импорттук көз карандылык, сезондук өзгөрүүлөр жана транспорттук чыгымдар таасир этет. Өзгөчө түндүк менен түштүк аймактардын ортосунда күйүүчү май жана айрым азык-түлүк товарлары боюнча баа айырмасы байкалып жатат.