Жайыл районунда «Орион–Экстра» жаңы тегирмен комплексинин капсуласын коюу аземи болуп өттү

Кыргызстандын азык-түлүк коопсуздугун чыңдоого жана кайра иштетүү өнөр жайын өнүктүрүүгө маанилүү кадам болгон «Орион–Экстра» жаңы тегирмен комплексинин капсуласын салтанаттуу түрдө коюу аземи болуп өттү. Бул долбоор жөн гана жаңы өндүрүштүк объектинин курулушу эмес, өлкөнүн агроөнөр жай комплексин модернизациялоого, ата мекендик айыл чарба өндүрүүчүлөрүн колдоого, жумуш орундарын түзүүгө жана региондордо социалдык туруктуулукту жогорулатууга багытталган стратегиялык демилгени ишке ашыруу болуп саналат.

Расмий маалыматтарга ылайык, 2025-жылдын биринчи жарым жылдыгынын жыйынтыгы боюнча Кыргызстандын ИДПсы 711,18 млрд сомду түзүп, 2024-жылдын ушул эле мезгилине салыштырмалуу 11,7%га жогорулаган. Экономикалык өсүшкө агрардык сектор жана кайра иштетүү өнөр жайы олуттуу салым кошууда. 2025-жылдын январь–июнь айларында эле тамак-аш өнөр жай ишканалары 48 млрд сомдон ашык суммага продукция өндүрүп, физикалык көлөмүнүн индекси 144%ды түздү.

Ун тартуу тармагы өзгөчө динамикалуу өнүгүүнү көрсөтүүдө. 2025-жылдын алгачкы беш айында 215 миң тоннадан ашык дан иштетилип, дээрлик 3,9 миллиард сомго жетти. Жаңы «Орион-Экстра» тегирмен комбинаты суткасына 250 тоннага чейин дан иштетүүнү камсыздайт, бул иштеп жаткан ишкананын кубаттуулугунан үч эсе көп.

Долбоорду ишке ашыруу кошумча 50 жумушчу орун түзөт. Азыр ишканада 25 адам эмгектенет, ал эми толук кубаттуулукка чыкканда штат эки эсе көбөйөт. Ошондой эле салыктык түшүүлөрдүн олуттуу өсүшү күтүлүүдө - 2024-жылы 14 миллион сомдон жаңы объект ишке киргенден кийин жылына 40 миллион сомго чейин. Социалдык төлөмдөр жылына 2 миллион сомго чейин көбөйөт.