Кепилдик фонду сегиз айда бизнеске 11,8 млрд сомго жакын насыя тартууга көмөктөштү

2026-жылдын январь-август айларында Кыргызстандын Кепилдик фонду жалпы суммасы 3 млрд 586,9 млн сомду түзгөн 1 миң 305 кепилдик берди. Бул тууралуу фонддун маалыматы күбөлөндүрөт.

Берилген кепилдиктердин жардамы менен ишкерлер банктардан 11 млрд 764,4 млн сом өлчөмүндө насыя тартууга мүмкүнчүлүк алышкан.

Кепилдиктердин эң чоң көлөмү өнөр жай тармагына туура келип, 917,9 млн сомду түзгөн. Андан кийинки орундарда соода тармагы — 550,7 млн сом, кызмат көрсөтүү — 503,3 млн сом, курулуш — 377,6 млн сом жана транспорт тармагы — 352,4 млн сом менен турат.

Ипотекалык насыялар үчүн 349,8 млн сомдук, айыл чарбасына 301,5 млн сомдук, туризмге 118,9 млн сомдук, ал эми айыл чарба продукциясын кайра иштетүүгө 114,7 млн сомдук кепилдик берилген.

Мындан тышкары, фонд аялдардын ишкердигин колдоого өзгөчө көңүл бурат. 2026-жылдын сегиз айында аял ишкерлерге 477 кепилдик берилген.

Салыштыруу үчүн, 2025-жылы Кепилдик фонду жалпы суммасы 3 млрд 789,2 млн сомду түзгөн 1 миң 656 кепилдик берген. Алардын негизинде ишкерлер дээрлик 13 млрд сом насыя тартууга жетишкен.

Белгилей кетсек, фонддун таблицасында сентябрь айынын көрсөткүчтөрү азырынча толтурула элек. Ошондуктан 2026-жылга карата келтирилген маалыматтар январь-август айларын гана камтыйт.