Кыргызстандын ИДПсы доллар менен эсептегенде беш жылда дээрлик үч эсеге өстү – Bloomberg

Кыргызстан дүйнөдөгү экономикасы эң тез өсүп жаткан өлкөлөрдүн катарына кирди. 2020-жылдан 2025-жылга чейин өлкөнүн ички дүң продукциясы (ИДП) доллар менен эсептегенде дээрлик үч эсеге көбөйдү. Бул тууралуу Bloomberg агенттиги Эл аралык валюта фондунун (ЭВФ) баалоосуна таянып билдирди.

2025-жылы Кыргызстандын экономикалык өсүшү болжол менен 11%ды түзгөн. Божомолдорго ылайык, 2030-жылга карата өлкөнүн ИДПсынын доллар менен эсептелген көлөмү 2025-жылдагы көрсөткүчкө салыштырмалуу дээрлик эки эсеге көбөйүшү мүмкүн.

Агенттик белгилегендей, Кыргызстандын экономикалык өсүшү чийки зат экспорттоочу көптөгөн өлкөлөрдөгү кырдаалдан айырмаланат.

Экономиканын кеңейишине соода жана курулуш көлөмүнүн көбөйүшү, мамлекеттик чыгымдардын өсүшү, акча которуулардын жана капиталдын агымы негизги факторлордон болду.

Ошондой эле транспорттук инфраструктураны өнүктүрүү өзгөчө роль ойнойт.

Кыргызстандын Улуттук банкынын төрагасы Алмаз Бакетаев агенттикке берген маегинде Кыргызстан тарыхый жактан Кытай, Казакстан, Россия жана аймактагы башка мамлекеттердин ортосундагы транзиттик түйүн катары кызмат кылып келгенин белгилеген.

Учурда өлкө энергетикалык долбоорлорго, кайра жаралуучу энергия булактарына жана транспорттук тармактарды өнүктүрүүгө олуттуу каражат жумшоодо.

Ири инфраструктуралык долбоорлордун бири — Кытай – Кыргызстан – Өзбекстан темир жолунун курулушу.

Бакетаевдин айтымында, жаңы темир жол республикасынын Улуу Жибек жолунун заманбап соода каттамдарындагы позициясын бекемдөөгө мүмкүндүк берет.

Ошол эле учурда экономикалык тобокелдиктер да сакталууда. Атап айтканда, инфляциянын жогорку деңгээли акча-кредит саясатын катаалдаштырууну талап кылат.

Буга карабастан, эл аралык каржы уюмдары жакынкы жылдары Кыргызстандын экономикасынын өсүшү уланарын күтүшүүдө.