Алкоголдук продукцияга акциздик салыктын ставкаларынын этабы менен жогорулашы жөнүндө
Кыргыз Республикасынын Экономика жана коммерция министрлиги Кыргыз Республикасынын Министрлер Кабинетинин «Кыргыз Республикасынын Министрлер Кабинетинин салык салуу чөйрөсүндөгү айрым токтомдоруна өзгөртүүлөрдү киргизүү жөнүндө» токтом долбоору демилгеленгендигин билдирет.
Токтом долбоору 2026-жылдан 2029-жылга чейинки мезгилде айрым алкоголдук продукцияларга акциздик салыктын ставкаларынын бара-бара жогорулашын жана курамында кант бар балдардын ичимдиктерин акциздик салыктан жана акциздик марка менен маркалоодон бошотууну алып салууну карайт. Мисалы, акциздин төмөнкүдөй динамикасы сунушталууда
- Спирт, арак, ликер-арак буюмдары, күчөтүлгөн ичимдиктер, күчөтүлгөн ширелер жана бальзамдар: 2025-жылы литрине 160 сомдон 2026-жылы 200 сомго чейин (40 сомго жогорулоо). Кийинки жылдары ставка жыл сайын 20 сомго көбөйүп, 2029-жылга карата литрине 260 сомду түзөт.
- Шарап: 2025-жылы литрине 20 сомдон 2026-жылы 25 сомго чейин (5 сомго жогорулоо). Андан кийин жыл сайын ставка 5 сомго өсүп, 2029-жылы литрине 40 сомго жетет.
- Көбүктүү шараптар, анын ичинде газдалган шарап жана шампан: 2025-жылы литрине 45 сомдон 2026-жылы 50 сомго чейин жыл сайын 5 сомго көбөйүп 2028-жылга чейин (60 сом), ал эми 2029-жылы акциздин ставкасын литрине 70 сом кылып белгилөө сунушталууда.
- Коньяк (коньяк спиртинен тышкары): 2025-жылы литрине 100 сомдон 2026-жылы 140 сомго чейин (20 сомго жогорулоо). Андан ары ставка жыл сайын өсүп, 2029-жылга карата литрине 200 сомду түзөт.
- Сыра: 2025-жылы литрине 17 сомдон 2026-жылы 20 сомго чейин, 2027-жылы литрине 25 сом жана 2028-жылдан баштап литрине 30 сом.
Бул чаралар зыяндуу продукцияны керектөөнү кыскартууга, Кыргызстандын салык саясатын эл аралык саясатка жакындатууга багытталган.
2025-жылдын 5-августундагы токтом долбоору Кыргыз Республикасынын ченемдик укуктук актыларынын долбоорлорун коомдук талкуулоо боюнча бирдиктүү порталына жайгаштырылган: https://koomtalkuu.gov.kg/ru/view-npa/5113