Кыргызстан төрт айдын ичинде болгону 3,3 тонна металл сыныктарын импорттогон

Кыргызстан 2026-жылдын январь–апрель айларында 3,3 тонна кара металл сыныктарын жана калдыктарын импорттоду. Бул көлөмдүн баары Кытайдан алынып келинген. Бул тууралуу металл сыныктарын экспорттоого убактылуу тыюу салууну узартуу боюнча токтом долбооруна тиркелген негиздемеде айтылат.

Салыштыруу үчүн айтсак, 2023-жылы Кыргызстан 403,9 тонна кара металл сыныктарын импорттогон. Анын 314,9 тоннасы Орусиядан, дагы 89 тоннасы башка өлкөлөрдөн келген.

2024-жылы импорттун көлөмү 187,4 тоннага чейин кыскарган. Анын ичинде Орусиядан 150,1 тонна, Кытайдан 37,3 тонна жеткирилген.

2025-жылы өлкөгө болгону 44,2 тонна металл сыныгы импорттолгон. Негизги жеткирүүчүлөр Кытай жана Өзбекстан болгон.

Министрлер кабинетинин маалыматына ылайык, Орусиядан ташылып келүүчү көлөмдүн азайышы экспорттук бажы алымдарынын колдонулушуна байланыштуу. Орусия үчүнчү өлкөлөргө металл сыныктарын экспорттоодо 5% өлчөмүндө, бирок ар бир тонна үчүн кеминде 70 евро өлчөмүндө экспорттук алым алат.

Ошол эле учурда Кыргызстандагы негизги куюучу ишканалардын жалпы кайра иштетүү кубаттуулугу жылына болжол менен 490 миң тоннага жетет.

Импорттун кыскарышы жана ички рынокто суроо-талаптын жогору болушуна байланыштуу бийлик кара металл сыныктарын жана калдыктарын өлкөдөн сыртка чыгарууга киргизилген убактылуу тыюу салууну узартууну сунуштоодо.