Эми иштебеген компанияларды жоюу тартиби жеңилдеп, ылдамыраак болот

Кыргызстанда көптөгөн юридикалык жактар катталган, бирок алардын көпчүлүгү узак убакыттан бери иштебей келет – салык төлөбөйт, бизнесин жүргүзбөйт жана маалыматтарын жаңылабайт. Мындай компаниялар мамлекетке, жарандарга жана ишкерлерге тоскоолдук жаратышат. Мамлекет үчүн бул негизинен – пландоодо, контролдоодо жана экономикалык абалды талдоодо колдонулган статистика менен реестрлердин так эместиги.

Мындан тышкары, салык кызматы мындай юридикалык жактар жөнүндө маалыматты издөө жана көзөмөлдөө үчүн кошумча ресурстарды сарптоого мажбур болот.

Жарандар менен ишкерлер үчүн мындай компаниялар – тобокелдиктин булагы. Келишим түзүүдө, өнөктөштөрдү же камсыздоочуларды тандоодо компаниянын ишенимдүү экенин жана чынында иш жүргүзүп жатканын аныктоо кыйынга турат. Реестрлердеги эскирген маалымат контрагенттерди текшерүүгө тоскоол болуп, алдамчылык же каржылык жоготуулардын тобокелдигин жогорулатат.

Бул көйгөйлөрдү чечүү максатында иштебеген юридикалык жактарды жоюу тартибин жөнөкөйлөтүүчү мыйзам кабыл алынды.

Эми мамлекеттик органдар менен салык кызматкерлери мындай фирмаларды жөнөкөй ыкма – соттун буйругу аркылуу жоюуга мүмкүнчүлүк алышат. Мекемени жоюуга каршы чыккан тарап болбосо, узак убакыт күтүп, татаал соттук жараяндан өтүү кереги жок.

Мыйзам ошондой эле жоюу демилгесин баштоого укуктуу адамдардын чөйрөсүн кеңейтет. Мисалы, эгер негиздөөчүлөрдүн бири каза болуп же дайынсыз жоголсо, калгандары компанияны жабуу үчүн сотко кайрыла алышат.

Өтө маанилүү жагдай – эгер жоюлуп жаткан компаниянын банктарга, кызматкерлерге, үлүш ээлерине же мамлекетке (салык, айып пул жана башка милдеттенмелер) карызы болсо, анын жоюлушу бул карыздарды жокко чыгарбайт. Карыз берүүчүлөрдүн төлөм алуу боюнча талаптарын билдирүү үчүн бир ай мөөнөт берилет. Карыздар мыйзамда белгиленген тартипте эсептелип, биринчи кезекте мамлекетке жана кызматкерлерге болгон карыздар төлөнөт.

Мыйзам долбоору дебюрократизация алкагында иштелип чыккан. Кыргыз Республикасынын Жогорку Кеңеши бул мыйзамды үч окууда карап, кабыл алган.