Кыргызстандык калыс Малайзияда АФК уюштурган семинарга катышты

Малайзиянын Куала-Лумпур шаарында Азия футбол конфедерациясы (АФК) уюштурган беш күндүк AFC Video Match Official Selection 2025 семинары жыйынтыкталды. Бул тууралуу Кыргыз футбол биримдигинен кабарлашты.

Маалыматка ылайык, Кыргызстан тараптан бул маанилүү иш-чарага ата мекендик калыс Вероника Бернацкая катышып, кыргыз футбол калыстыгынын эл аралык аренадагы ордун чыңдоону улантууда.

Семинарга жалпы 34 катышуучу, анын ичинде ФИФАнын Эл аралык тизмесине жаңыдан кирген 17 видеоматчтын расмий өкүлү катышты. Айрыкча, аял-калыстардын даярдыгына өзгөчө көңүл бурулуп, бул 2026-жылы өтө турган аялдар арасындагы Азия Кубогунда бардык 25 оюнда VAR технологиясын колдонуунун алдында маанилүү кадам болду.

Семинардын программасы оюн эрежелерин билүүнү текшерүү, видеотесттер, ошондой эле теориялык жана практикалык сабактарды камтыды. Катышуучулар VAR симуляторлору менен иштеп, оюн эпизоддорун анализдеп, контролдонуучу шарттарда окуяларды башкарууну үйрөнүштү. Курстун маанилүү бөлүгү катары 90 мүнөттүк толук оюндар өткөрүлүп, мобилдик VAR системасы колдонулуп, реалдуу убакытта чечим кабыл алуу көндүмдөрү бекемделди.

Семинардын акыркы күнү интерактивдүү сессия форматында өтүп, катышуучулар өз өлкөлөрүндөгү ассоциациялар VAR-системасын колдонууда пайда болгон көйгөйлөрдү жана аларды чечүү жолдорун талкуулашты.