Айваз Оморканов Улуттук олимпиада комитетинин президенти болуп шайланды

Айваз Оморканов Улуттук олимпиада комитетинин президенти болуп шайланды. Ал комитеттин башчылыгына жалгыз талапкер болду.  Шайлоо бүгүн, 11-майда Бишкекте өтүп, комитеттин 49 мүчөсү катышып, анын 48и макул, бирөө каршы добуш берди.

Буга чейин бул кызматка Кыргызстандын Волейбол федерациясынын президенти Элмурза Сатыбалдиев жана Кыргыз футбол биримдигинин биринчи вице-президенти Нурдин Букуев дагы талапкер болушкан. Бирок алар добуш берүүгө бир күн калганда талапкерлигин алып салышкан. 

Айваз Оморканов Кыргызстандын Хоккей федерациясынын вице-президенти. Аны атасы Анвар Оморканов жетектейт. 

Айваз Оморканов 30 жашта, Бишкек шаарында төрөлгөн. 25 жашында Азия жана Океания аймагы боюнча Эл аралык хоккей федерациясынын эң жаш вице-президенти болуп калган. Ал бүткүл Азия аймагында хоккейдин өнүгүшүн көзөмөлдөйт.