Кыргызстандык окуучулар Алматыда өткөн математика олимпиадасында үч коло медаль жеңди

Кыргызстандын жаш математиктери профессор Шалтай Смагулов атындагы 6–7-класстардын окуучулары арасында өткөрүлгөн математика боюнча республикалык олимпиадада үч коло медаль жеңип алышты.

Агартуу министрлигинен кабарлашкандай, интеллектуалдык таймаштын жыйынтыктоочу этабы 2026-жылдын 13–14-июнунда Алматы шаарында өттү.

Аталган олимпиадага Казакстан, Кыргызстан жана Өзбекстандын окуучулары катышты. Тандоо этабына 3000ден ашуун окуучу катышып, алардын ичинен 6–7-класстардын 106 окуучусу финалдык баскычка жолдомо алган.

Олимпиаданын жыйынтыгы боюнча Кыргызстандын курама командасынын ийгилиги:

• Зарылбеков Нурислам — Бишкек шаарындагы №70 мектептин 7-классынын окуучусу, коло медаль;

• Матиев Байаман — Ош шаарындагы Купуев академиясынын 7-классынын окуучусу, коло медаль;

• Сайпидинов Умар — «Акылман» президенттик лицейинин 7-классынын окуучусу, коло медаль;

• Яголковский Артём — «Газпром Кыргызстан» мектебинин 7-классынын окуучусу, Ардак грамота;

• Акимов Атай — «Газпром Кыргызстан» мектебинин 6-классынын окуучусу, катышуучу;

• Анарбаев Эртуран — Бишкек шаарындагы Е. Б. Якир атындагы автордук физика-математикалык № 61 мектептин 6-классынын окуучусу, катышуучу;

• Канибеков Эмирхан — Бишкек шаарындагы Е. Б. Якир атындагы автордук физика-математикалык № 61 мектептин 6-классынын окуучусу, катышуучу;

• Курманалиев Нурахмед — Ош шаарындагы Купуев академиясынын 5-классынын окуучусу, катышуучу.

Команданын жетекчиси — Айбар Аманов.

Команданын машыктыруучулары: Мамат Ишматов, Шумкарбек Абдураимов, Бекжол Жолдубай уулу, Айдин Асанкадыров, Нурсултан Эшперов, Назар Киргизбаев.

Кыргызстан профессор Шалтай Смагулов атындагы олимпиадага 2018-жылдан бери активдүү катышып келет.