ССМ: мектеп окуучусунун рюкзагынын салмагы анын дене салмагынын 15%ынан ашпашы керек

Жаңы окуу жылына даярдык көрүүдө ата-энелерге мектеп окуучусуна рюкзак тандоого өзгөчө көңүл буруу сунушталат. Кыргызстандын Саламаттык сактоо министрлигине караштуу Республикалык ден соолукту чыңдоо жана массалык коммуникациялар борбору баланын омурткасына түшкөн күчтү азайтууга жардам бере турган негизги эрежелерди эске салды.

Негизги талаптардын бири — рюкзактын салмагы. Ичиндеги окуу куралдары менен кошо рюкзактын салмагы баланын дене салмагынын 15%ынан ашпашы керек.

Рюкзактын өлчөмүн баланын учурдагы боюна жараша тандоо зарыл. Адистер рюкзакты «чоңойгондо да жарайт» деген максатта алдын ала чоң өлчөмдө сатып алууну сунуштабайт.

Рюкзактын үстүңкү бөлүгү баланын желкесине тийбеши, ал эми төмөнкү бөлүгү белдин деңгээлинде болушу керек.

Боолорун рюкзак аркага тыгыз жайгашып, салмак бирдей бөлүштүрүлө тургандай кылып тууралоо зарыл.

Ошондой эле адистер мектеп рюкзагын эки боосуна тең асынып жүрүүнү сунушташат. Аны бир ийинге же колго көтөрүп жүрүү денедеги тең салмактуулукту бузуп, борбордун маалыматына ылайык, каптал сколиозунун пайда болуу коркунучун жогорулатат.

Саламаттык сактоо министрлиги рюкзакты туура тандоо жана аны туура алып жүрүү окуу жылы бою баланын омурткасынын жана дене түзүлүшүнүн саламаттыгын сактоого жардам берерин белгилейт.