Кыргызстандын окумуштуулары, алардын долбоорлору жана жыйынтыктары бирдиктүү платформага бириктирилет

Кыргызстанда «Кыргызстандын илими» аттуу бирдиктүү маалыматтык системаны түзүү пландалууда. Ал өлкөдөгү илимий ишмердиктин бардык катышуучулары тууралуу маалыматтарды, анын ичинде илимий долбоорлорду, кадрдык курамды, илимий инфраструктураны жана ишмердүүлүктүн натыйжалуулук көрсөткүчтөрүн бириктирет.

Мындай милдеттер Министрлер кабинети бекиткен 2040-жылга чейин илимди өнүктүрүү концепциясында каралган.

Ошондой эле улуттук илимий репозиторийлерди, санариптик маалымат базаларын жана изилдөөлөрдүн жыйынтыктарына ачык жеткиликтүүлүктү камсыз кылган инструменттерди түзүү пландалууда.

Санариптик системалар аркылуу илимий долбоорлорду эсепке алуу, мониторинг жүргүзүү, отчеттуулук, экспертиза жана алардын натыйжалуулугун баалоо иштери жүргүзүлөт.

Бирдиктүү санариптик платформаны жана илимий-изилдөө жана тажрыйбалык-конструктордук иштерди эсепке алуу маалыматтык системасын ишке киргизүү Концепцияны ишке ашыруунун биринчи этабында — 2026–2030-жылдары каралган.