Кыргызстан англис тили мугалимдерин даярдоо программаларын жаңылоо боюнча Британ Кеңешинин аймактык демилгесине катышты

Кыргыз Республикасынын өкүлдөрү Британ Кеңеши жана Өзбекстандын Мектепке чейинки жана мектептик билим берүү министрлиги тарабынан уюштурулган семинарга катышышты. Иш-чарага Казакстан, Кыргызстан, Тажикстан, Түркмөнстан жана Өзбекстандан 27 педагогикалык университеттин адистери катышып, англис тили мугалимдерин даярдоо боюнча улуттук окуу программаларын талдап, эл аралык мыкты тажрыйбалар менен салыштырып, пикир алышты.

Кыргызстандын атынан Ж. Баласагын атындагы Кыргыз улуттук университетинин, И. Арабаев атындагы Кыргыз мамлекеттик университетинин, Т. Эрматов атындагы музыкалык-педагогикалык институтунун жана Токтоналиев атындагы финансы техникумунун окутуучулары менен методисттери катышышты.

Семинардын жүрүшүндө ар бир өлкө PRESETT программасын биргелешип өнүктүрүү жана жаңылоо боюнча өз ара толуктоочу компетенцияларга ээ академиялык эксперттерден турган команданы түздү. Катышуучулар билим берүү тутумундагы өзгөрүүлөрдү натыйжалуу башкаруу боюнча жаңы билимдерди да алышты.

Буга чейин AELLCA (Accelerating English Language Learning in Central Asia) программасынын алкагында Британ Кеңеши 2025-жылы Борбор Азиянын беш өлкөсүндө англис тили мугалимдерин даярдоо системасын жаңылоо боюнча артыкчылыктарды жана муктаждыктарды аныктоо максатында стратегиялык талкууларды өткөргөн.