ССМ бюджеттик гемодиализ кызматтарын көрсөтүү маселеси боюнча үн катты

Кыргызстандын Саламаттыкты сактоо министрлиги Башкы прокуратуранын бейтаптар каза болгондон кийин жана чет өлкөдө жүргөн жарандар үчүн гемодиализ процедуралары үчүн акы төлөө учурлары боюнча маалыматы боюнча комментарий берди.

Ведомствонун билдирүүсүнө караганда, Башкы прокуратурасы тарабынан жарыяланган маалыматка байланыштуу министрлик жүргүзүлүп жаткан тергөө иш-чараларынын алкагында укук коргоо органдары менен толук кызматташып жатканын жана өзүнүн ыйгарым укуктарынын чегинде бардык зарыл маалыматтарды берип жатат.

Бүгүнкү күндө бюджеттик гемодиализ программасы саламаттык сактоо системасындагы эң ири социалдык программалардын бири болуп саналат. Учурда мамлекеттин эсебинен 4 714 бейтап өмүр үчүн зарыл болгон бөйрөктү алмаштыруучу терапияны алып жатат. Ар бир бейтап жумасына үч жолу гемодиализ процедурасынан өтөт. Бир процедуранын баасы 6 500 сомду түзөт.

Бейтаптарды бюджеттик программага киргизүү медициналык көрсөтмөлөрдүн негизинде жүргүзүлөт. Арыздар адистештирилген комиссия тарабынан жума сайын каралып, орточо эсеп менен 15тен 25ке чейинки жаңы кайрылуу талкууланат. Акыркы бир нече жыл ичинде бюджеттик гемодиализ алуу боюнча кезек күтүү болгон эмес. Комиссиянын оң корутундусу чыккандан кийин бейтап дароо маалымат базасына киргизилип, бош орундар бар болгон учурда каалаган медициналык борбордон гемодиализ кызматын ала алат.

Министрлик көрсөтүлүп жаткан кызматтардын сапатына көзөмөл жүргүзүү механизмдерин, бейтаптарды эсепке алуу системасын жана мамлекеттик каражаттарды пайдалануунун ачык-айкындуулугун мындан ары да өркүндөтүүнү улантат. Бул чаралар системанын ачык-айкын иштешин камсыздоого жана бейтаптардын кызыкчылыктарын коргоого багытталган.