Жогорку Кеңеште өкмөттүн бир катар мүчөлөрү ант беришти

Бүгүн, 9-сентябрдагы Жогорку Кеңештин жыйынында Кыргыз Республикасынын Министрлер Кабинетинин айрым мүчөлөрү ант беришти. Жыйынга Кыргыз Республикасынын Президенти Садыр Жапаров катышты.

Алсак, төмөнкү жаңы дайындалган жетекчилер ант беришти:

- Министрлер Кабинетинин төрагасынын орун басары Улан Маматканов;

- Кыргыз Республикасынын финансы министри Руслан Суйналиев; 

- Кыргыз Республикасынын эмгек, социалдык камсыздоо жана миграция министри Алмаз Имангазиев;

- Кыргыз Республикасынын энергетика министри Алтынбек Рысбеков;

- Кыргыз Республикасынын юстиция министри Алмаз Айылчиев;

- Кыргыз Республикасынын Улуттук коопсуздук мамлекеттик комитетинин төрагасы Максат Асаналиев.

Андан соң Өлкө башчысы сөз сүйлөп, Жогорку Кеңештин кезектеги сессиясына ийгиликтерди каалоо менен өлкөдөгү жетишкендиктерге жана уюштурулган соңку иш-чараларга токтолду. 

Муну менен катар мамлекеттин өнүгүшү, экономиканын өсүшү, коомдогу туруктуулук мыйзам чыгаруу бийлигинин натыйжалуу ишине байланыштуу экенин белгилеген Садыр Жапаров: “Президент, Жогорку Кеңеш жана Министрлер Кабинети мамлекеттик саясаттын негизги багыттары боюнча өз ара түшүнүшүү жана конструктивдүү кызматташуу менен иш алып барганда гана мамлекет алдыга жылат”, – деди.