Кыргызстанда электр тармактарына көз каранды болбогон автономдуу калктуу конуштар түзүлүшү мүмкүн

Кыргызстандык, кытайлык жана өзбекстандык окумуштуулар борборлоштурулган электр тармактарына көз каранды болбогон автономдуу калктуу конуштарды түзүү долбоорун талкуулап жатышат.

Мындай долбоорлордун бири Кыргызстандын бийик тоолуу аймагында, экинчиси Өзбекстандын чөлдүү аймагында ишке ашырылышы сунушталууда.

Бул калктуу конуштарда күн энергиясы, суутек технологиялары жана башка автономдуу энергетикалык чечимдерди комплекстүү колдонуу пландалууда.

Долбоордун авторлорунун ою боюнча, турак үйлөр менен социалдык объектилер салттуу электр берүү линияларына кошулбастан эле электр энергиясы менен камсыз болушу керек.

Буга окшош эксперименталдык конуш буга чейин кытайлык адистер тарабынан чөлдүү аймакта курулган.

Окумуштуулар ошол тажрыйбаны изилдеп, аны Борбор Азиянын климаттык жана географиялык шарттарына ылайыкташтырууну көздөшүүдө.