Садыр Жапаров Кыргызстан менен АКШнын ортосунда түз аба каттамын ачууну сунуштады

Кыргызстандын президенти Садыр Жапаров Кыргызстан менен АКШнын ортосунда түз аба каттамын ачууну сунуштады. Мындай сунушта мамлекет башчысы 19-сентябрда Юта штатынын губернатору Спенсер Кокс жана Сенатынын президенти Стюарт Адамс менен жолугушуу учурунда билдирди. 

Тараптардын жолугушуусу Солт-Лейк-Сити шаарындагы Капитолий имаратында өткөн. 

Жолугушуунун жүрүшүндө тараптар кыргыз-америка кызматташтыгынын келечегин, ошондой эле Кыргызстан менен Юта штатынын ортосундагы экономикалык, инвестициялык жана маданий-гуманитардык тармактардагы өз ара аракеттенүүнү кеңейтүү мүмкүнчүлүктөрүн талкуулашты.

Кыргызстан жана Юта штатынын потенциалын эске алуу менен тоо-кен өнөр жайы, туризм, спорт, маалыматтык технологиялар, финансы жана инфраструктураны өнүктүрүү багыттарындагы өз ара аракеттенүү маселелерине өзгөчө көңүл бурулду.