Галина Байтерек президенттин администрациясынын басма сөз кызматынын жетекчиси болобу?

«Кыргыз туусу» басма үйүнүн директору Галина Байтерек анын президенттин администрациясынын басма сөз кызматынын жетекчиси кызматына дайындалат деген маалыматтарды четке какты. 

Анын айтымына караганда, акыркы бир нече күндөн бери социалдык тармактарда анын аталган кызматка дайындалышы боюнча кептер байма-бай айтылууда.

"Социалдык тармактарда мен тууралуу тарап жаткан маалыматтардын баары чындыкка дал келбейт. Мен бул кызматка талапкер эмесмин жана мындай ниетим жок", - деди ал.

Ал ошондой эле айрым колдонуучулар анын атын жалган маалыматтарды таратууга жана башка адамдын кадыр-баркына шек келтирүүгө багытталган аракеттерге колдонуп жатканын айтты. 

"Социалдык тармактарда маалымат бөлүшүүдө ар бирибиз жоопкерчиликтүү болсок деген өтүнүчүм бар. Текшерилбеген маалыматтарды таратпай, кимдир бирөөнүн аброюна шек келтирген негизсиз сөздөрдөн алыс бололу", - деп кошумчалады Байтерек.