Кыргызстан менен Индия стратегиялык өнөктөштүктү чыңдоо маселесин талкуулашты

Тышкы иштер министринин орун басары Кайрат Турсункулов 30-январда Индиянын Кыргызстандагы элчиси Бирендер Сингх Ядав менен жолугушту. Бул тууралуу КР ТИМден кабарлашты. 

Жолугушуунун жүрүшүндө тараптар социалдык маанидеги долбоорлорду практикалык ишке ашырууга өзгөчө көңүл буруп, кыргыз-индиялык кызматташтыктын кеңири актуалдуу маселелерин талкуулашты.

Алар соода-экономикалык, саламаттыкты сактоо, маданий жана гуманитардык тармактардагы кызматташтыкты андан ары өнүктүрүүгө өз ара кызыкдар экендигин баса белгилешип, жогорку жана эң жогорку деңгээлдердеги, анын ичинде алдыдагы көп тараптуу иш-чаралардын алкагында үзгүлтүксүз саясий байланыштарды сактоонун маанилүүлүгүн белгилешти.

Жолугушуунун жыйынтыгында тараптар кыргыз-индиялык стратегиялык өнөктөштүктү андан ары чыңдоо үчүн биргелешип иштөөгө болгон милдеттенмелерин тастыкташты.