Жарым жылда Кыргызстанда 816 ымыркай чарчап калды

Кыргызстанда 2026-жылдын январь–июнь айларында бир жашка чейинки 816 бала чарчап калган. Бул тууралуу Кыргызстандын Улуттук статистика комитети билдирди.

2025-жылдын ушул эле мезгилинде мындай 781 учур катталган. Ошентип, чарчаган ымыркайлардын саны 35ке көбөйгөн.

Ымыркайлардын өлүмүнүн көрсөткүчү 1 миң тирүү төрөлгөн балага 12,3тү түздү. Былтыр бул көрсөткүч 12,0 болгон.

Ымыркайлардын өлүмүнүн негизги себеби перинаталдык мезгилде пайда болгон абалдар болгон. Алардын кесепетинен 555 ымыркай чарчап, бул бир жашка чейинки каза болгон балдардын жалпы санынын 68 пайызын түздү.

Тубаса аномалиялардан, өнүгүү кемтиктеринен, деформациялардан жана хромосомалык бузулуулардан 135 бала, дем алуу органдарынын ооруларынан 71 бала көз жумган.

Мындан тышкары, 16 бала нерв системасынын ооруларынан, жети бала тышкы себептерден, үч бала айрым инфекциялык жана мите оорулардан каза болгон.