Орунтаев мыйзамсыз курулушка барган компанияларга кандай чара көрүлөөрүн айтты

2024-2025- жылдары Кыргызстанда бир дагы мыйзамсыз курулуш аныкталган жок. Бул көзөмөлдү жана тартипти катаалдаштыруудан улам болду. Бул тууралуу курулуш, архитектура жана коммуналдык чарба министри Нурдан Орунтаев билдирди.

“2023-жылы 200гө жакын мыйзамсыз курулуштар аныкталган. Анын 100гө жакынын тийиштүү инженердик изилдөөлөрдү жүргүзүп легалдаштырып, эксплуатацияга бердик, учурда техникалык паспортторун алып жатышат”, – деди ал. 

Орунтаев белгилегендей, эгерде курулушта мамлекет тарабынан берилген QR-код же техникалык паспорт жок болсо, анда ал курулуш мыйзамсыз деп саналат. Мыйзамсыз курулушка барган компанияга төмөнкүдөй чара көрүлөт: 

1. Айыппул салынат. 
2. Курулуш токтотулат. 
3. Компаниянын лицензиясы артка кайтарылат жана башка курулуштарга катышууга мүмкүнчүлүк берилбейт.