Бишкектин жол инфраструктурасын оңдоого жана көрктөндүрүүгө 158 млн сом каралган

2026-жылы Бишкектин жол инфраструктурасын оңдоого жана көрктөндүрүүгө 158 миллион сом каралган. Бул тууралуу «Биринчи радионун» түз эфиринде «Бишкекасфальтсервис» муниципалдык ишканасынын жетекчиси Адлет Казакбаев билдирди.

Каражат төрт административдик районго бөлүнүп, ар бирине 39,5 миллион сомдон бөлүнөт.

Каржылоо жолдордогу чуңкурларды оңдоого, жол белгилерин жана разметкаларды жаңылоого, арык лотокторун алмаштырууга, аялдама комплекстерин орнотууга жана кошумча унаа токтотуучу жайларды курууга багытталат.

Мэриянын өкүлдөрүнүн айтымында, бул иштер муниципалитеттин каражаттарынын эсебинен жүргүзүлөт. Аталган иш-чараларга Кытайдын гранттык каражаттары пайдаланылбайт.