Канат Сагынбаев эмгек укуктарын коргоону күчөтүп, Эмгек министрлигинин ишинин сапатын жогорулатууну тапшырды

Кыргызстандын эмгек, социалдык камсыздоо жана миграция министри Канат Сагынбаев Министрлер кабинетинин 2026-жылга карата иш-аракеттер планын аткарууга көзөмөлдү күчөтүүнү, ченемдик укуктук иштердин сапатын жогорулатууну жана жарандардын эмгек укуктарын коргоо боюнча көрсөткүчтөрдүн төмөндөшүнүн себептерин аныктоону тапшырды.

Тиешелүү тапшырмаларды ал министрликтин 2026-жылдын биринчи жарым жылдыгынын жыйынтыгы боюнча өткөн коллегиясынын отурумунда берди.

Министр өзүнүн орун басарларына, түзүмдүк бөлүмдөрдүн жетекчилерине жана жооптуу аткаруучуларга Министрлер кабинетинин иш-аракеттер планында каралган бардык иш-чараларды өз убагында жана толук аткарууну камсыз кылууну тапшырды.

Акыркы көрсөткүчтөргө жетишүүгө жана берилген отчеттордун сапатына өзгөчө көңүл буруу тапшырылды. Сагынбаев жетекчилерди бекитилген иш-чаралардын аткарылбагандыгы үчүн жеке жоопкерчилик тартары тууралуу эскертти.

Мындан тышкары, министр эмгек укуктарын коргоо жаатындагы көрсөткүчтөргө өзгөчө көңүл бурду. 2026-жылдын биринчи жарым жылдыгынын жыйынтыгы боюнча өндүрүштөгү кырсыктан же жаракаттан келтирилген зыян үчүн төлөнгөн компенсациялардын суммасы 11,4 млн сомду түзүп, өткөн жылдын ушул мезгилиндеги 58,8 млн сомго салыштырмалуу кыйла азайган. Ал эми жарандарга кайтарылган эмгек акы боюнча карыздын көлөмү 7,2 млн сомдон 4,4 млн сомго төмөндөгөн.

Сагынбаев жооптуу түзүмдөргө бул көрсөткүчтөрдүн төмөндөшүнүн себептерин тыкыр талдап, тиешелүү чараларды көрүүнү тапшырды.

Ошондой эле ченемдик-укуктук базаны өркүндөтүү боюнча системалуу ишти күчөтүү жана министрлик тарабынан иштелип чыккан ченемдик укуктук актылардын долбоорлорунун сапатын жогорулатуу милдети коюлду.