Пакистандын элчиси Кыргызстанга пакистандык туристтер үчүн виза алууну жеңилдетүүгө чакырды

Кыргызстан пакистандык туристтер үчүн виза алуу жол-жобосун жөнөкөйлөтсө, өлкөгө келген туристтердин санын кыйла көбөйтө алат. Бул тууралуу Пакистан Ислам Республикасынын Кыргыз Республикасындагы Атайын жана Ыйгарым укуктуу элчиси Алтамаш Вазыр Хан «Биринчи радионун» түз эфиринде билдирди.

Анын айтымында, миңдеген пакистандыктар Баку жана Ташкент шаарларына байма-бай саякаттап турушат. Себеби бул багыттарга сапарды уюштуруу жеңилирээк: билет сатып алып, виза маселесин салыштырмалуу тез чечүүгө болот.

Ал эми Кыргызстанга келүү үчүн, дипломат белгилегендей, потенциалдуу турист алдын ала документтерин тапшырып, чечимди күтүүгө туура келет.

«Кээде бул жети күн, кээде он күнгө созулат. Алар визаны алабы же жокпу, билишпейт», — деди элчи.

Анын пикиринде, мындай шартта туристтердин бир бөлүгү башка багытты тандап коюшу мүмкүн.

Алтамаш Вазыр Хан Кыргызстанда, өзгөчө Ысык-Көлдө, туризмди өнүктүрүү үчүн чоң мүмкүнчүлүк бар экенине өзүнчө токтолду. Анын айтымында, республиканын жаратылыш байлыктары туристтерди тартуу боюнча атаандашууга мүмкүнчүлүк берет. Бирок бул мүмкүнчүлүктөрдү активдүү жайылтуу менен катар өлкөгө кирүү шарттарын да жеңилдетүү зарыл.

Элчи визалык режимди жөнөкөйлөтүү өзү эле туристтик агымга түрткү бере аларын белгиледи. Анткени туризм, бизнес жана маданий байланыштар бири-бири менен тыгыз байланышта.