Ала-Букада диагностика жана консультация үчүн жаңы корпус куруу сунушталды

Жогорку Кеңештин депутаттары Кыргызстандын бир катар калктуу конуштарында медициналык инфраструктуранын жетишсиздигине көңүл бурушту.

Токтобүбү Ашимбаева Бишкектеги «Алтын-Казык» конушунун жашоочулары үчүн медициналык жана дарыкана кызматтарынын жеткиликтүүлүгү маселесин көтөрдү.

Айсаракан Абдиева Жалал-Абад облусунун Ала-Бука районундагы жалпы дарыгерлер практикалык борборунун консультациялык жана диагностикалык бөлүмдөрү үчүн кошумча имарат курууну сунуштады.

Гүлшаркан Култаева Таш-Көмүр шаарындагы Кызыл-Жар-12 конушунун жашоочуларынын кайрылуусун билдирди. Жашоочулар турак жайга тиешелүү документтерди тариздөө менен катар медициналык кызматтардын жеткиликтүүлүгү көйгөйүн чечүүнү өтүнүшүүдө.

Алтынбек Кудайбердиев Ош шаарындагы «Манас-Ата» МТБ жашоочуларынын кайрылуусун да айтып, алар Ош облустар аралык дерматовенерологиялык ооруканасын көчүрүп, анын ордуна бала бакча куруу маселесин көтөрүп жатканын билдирди.

Депутаттар тиешелүү мамлекеттик органдардан жашоочулардын кайрылууларын карап чыгып, тиешелүү чараларды көрүүнү өтүнүштү.