Гүлназ Сарбашева: Майлуу-Сууда туристтерге бир эле объект эмес, таасирлердин бүтүндөй комплекси сунушталат
Майлуу-Сууда Туристтик маалымат борбору түзүлдү. Ал шаарга келген коноктор үчүн баштапкы чекит болот. Бул жерден туристтер Майлуу-Суунун кооз жерлери жана тарыхы тууралуу маалымат алып, маршруттарды тандап, мейманканалар жана кафелер жөнүндө билип, ошондой эле жергиликтүү маданият жана усталардын буюмдары менен тааныша алышат. Шаарга мындай борбор эмне үчүн керек, ал кандай мүмкүнчүлүктөрдү ачат жана Майлуу-Суу саякатчыларды эмнеси менен кызыктырары тууралуу Туристтик маалымат борборунун директору Гүлназ Сарбашева айтып берди.
– Майлуу-Сууда Туристтик маалымат борбору эмне үчүн түзүлдү жана ал кандай роль ойнойт?
– Майлуу-Суу – өзгөчө тарыхы жана али толук ачыла элек чоң туристтик потенциалы бар шаар. Ошондуктан Туристтик маалымат борборун түзүү туризмди өнүктүрүүдө биз үчүн маанилүү кадам болду. Биз шаарыбызды тааныштырып, аны коноктор үчүн ачык жана түшүнүктүү кылгыбыз келет.
Борбор Майлуу-Суунун так ортосунда, Ленин көчөсү, 50 дарегинде жайгашкан. Бул туристтер үчүн ыңгайлуу – бизди оңой эле табууга болот.
Бул жерден адам шаар тууралуу бардык керектүү маалыматты ала алат, анын кооз жерлери жана тарыхы менен тааныша алат, туристтик маршруттар, кафелер, мейманканалар жана башка объектилер тууралуу биле алат. Башкача айтканда, Майлуу-Сууда саякаттоо үчүн керектүү маалыматтын баарын бир жерден алууга болот.
– Борборду ачууга эмне жардам берди?
– Борборду гранттык долбоорду ишке ашыруунун жана Европа Биримдигинин, Бириккен Улуттар Уюмунун Өнүктүрүү программасынын (ПРООН) жана ЕККУнун колдоосунун аркасында ачтык.
Долбоордун алкагында имараттын ичи жана сырты оңдолуп-түзөлүп, толук даярдалды. Ошондой эле борбордун толук кандуу иштеши үчүн эмеректер жана керектүү техникалар сатып алынды.
Европа Биримдигинин, ПРООНдун жана ЕККУнун өкүлдөрүнө Майлуу-Суунун өнүгүүсүнө кошкон салымы жана көрсөткөн колдоосу үчүн өзгөчө ыраазычылык билдиребиз. Бул биз үчүн чындап эле шаарга кошулган салым жана анын мүмкүнчүлүктөрүнө болгон ишеним.
Шаар тургундары да четте калбай, бул демилгени колдойт жана мындан ары аткарылып жаткан иштердин натыйжалары көрүнөт деп үмүттөнөбүз.
– Майлуу-Суу туристтер үчүн эмнеси менен кызыктуу болушу мүмкүн?
– Майлуу-Суу чындап эле уникалдуу тарыхка жана мураска ээ. Бул жерде өнөр жай тарыхы, маданият, архитектура жана жаратылыш айкалышып турат.
Биринчи кезекте бул – тарыхый жана архитектуралык мурас. Турист шаардын тарыхы жана анын өнөр жай өтмүшү менен тааныша алат. Бизде электр лампа заводунун тарыхы, уран калдыктары бар – мунун баары Майлуу-Суунун тарыхынын бир бөлүгү.
Андан тышкары, шаардын айланасында тоолор жана кооз жаратылыш ландшафттары жайгашкан. Конокторго сунуштай турган тоо маршруттары буга чейин эле бар болчу.
– Бул жерде туризмдин кайсы багыттарын өнүктүрүүгө болот?
– Жөө жана тоо туризминин потенциалы чоң. Жаратылыш шарттары треккингди, экологиялык жана таанып-билүүчү экскурсияларды өнүктүрүүгө мүмкүндүк берет. Биз буга чейин да ушул багытта иштеп келгенбиз.
Бирок турист бир гана маршрутту же бир гана тарыхый объектти көрүү үчүн келишин каалабайбыз. Биз конокторду жергиликтүү маданият жана салттар менен тааныштыра алабыз, мастер-класстарды өткөрүп, гастрономиябызды жана жергиликтүү өндүрүүчүлөрдүн продукцияларын көрсөтө алабыз.
Башкача айтканда, Майлуу-Суу туристке бир эле объектти эмес, таасирлердин бүтүндөй комплексин сунуштай алат.
– Борбордо жергиликтүү усталардын продукциялары да көрсөтүлгөнбү?
– Ооба. Бизде кичинекей сувенир дүкөнү бар. Ал жерде көрсөтүлгөн бардык буюмдар биздин тургундар тарабынан жасалган. Бул – алар өз колу менен, жан дүйнөсүн салып жасаган буюмдар.
Туристтер аларды көрүп гана тим болбостон, Майлуу-Суудан эстелик катары бир нерсе сатып ала алышат. Ал эми жергиликтүү усталар үчүн бул – шаардын конокторуна өз эмгегин көрсөтүүгө кошумча мүмкүнчүлүк.
– Жакынкы арада борбордун алдына кандай милдеттерди коюп жатасыздар?
– Башкы максат – Майлуу-Суунун туристтик потенциалын ачуу жана биздин шаар тарыхы, өнөр жай мурасы, жаратылышы жана маданияты менен кызыктуу экенин көрсөтүү.
Биз бул жакка келген адам кайда барса болорун, эмнени көрө аларын, кайда токтосо болорун жана кандай таасирлерди аларын түшүнсүн дейбиз.
Туристтик маалымат борбору дал ушул маалыматтардын баарын бириктирип, Майлуу-Суу менен таанышууну баштоочу жай болушу керек.