Кыргызстанда кепилденген депозиттер 5 жылда 7,2 эсеге, Депозиттерди коргоо фондунун каражаты 2,9 эсеге өстү

Кыргызстанда кепилденген депозиттердин көлөмү акыркы беш жылда 7,2 эсеге көбөйгөн. Ал эми Депозиттерди коргоо фондунун каражаттары ушул эле мезгилде болгону 2,9 эсеге өскөн. Бул маалыматтар «Банктык салымдарды (депозиттерди) коргоо жөнүндө» мыйзамга өзгөртүүлөрдү киргизүү тууралуу мыйзам долбооруна тиркелген негиздеме-маалымкатта келтирилген.

2020-жылы кепилденген депозиттердин көлөмү 31 млрд 342 млн сомду түзсө, 2025-жылдын 31-декабрына карата 225 млрд 566 млн сомго жеткен. Ошентип, көрсөткүч 7,2 эсеге көбөйгөн.

Ошол эле учурда Депозиттерди коргоо фондунун каражаттары 2020-жылдагы 3 млрд 392 млн сомдон 2025-жылдын аягында 9 млрд 710,3 млн сомго чейин өскөн. Бул болжол менен 2,9 эсеге көп.

Өсүш темптериндеги айырмачылыктан улам фонддун кепилденген депозиттерге карата жетиштүүлүк коэффициенти төмөндөгөн. 2020-жылы бул көрсөткүч 10,8 пайызды түзсө, 2025-жылдын аягында 4,3 пайызга түшкөн.

Мыйзамдарда Депозиттерди коргоо фондунун максаттуу деңгээлин кепилденген депозиттердин көлөмүнүн кеминде 12 пайызы өлчөмүндө кармоо каралган.

Мыйзам долбоорунун авторлорунун пикиринде, депозиттик рыноктун көлөмү жана системанын милдеттенмелери өскөн шартта фондду түзүүнүн азыркы механизми талаптарга жооп бербей калды.