Финансы министри Алмаз Бакетаев Moody’s коммерциялык бөлүмүнүн башкаруучу директору Дэвид Элдрич менен жолукту           

2025-жылдын 16-октябрында Кыргыз Республикасынын финансы министри Бакетаев Алмаз Кушбекович Moody’s башкаруучу директору Дэвид Элдрич менен кызматташуунун келечеги, өлкөнүн кредиттик рейтинги, инвестициялык имидж жана тышкы каржылоону тартуу маселелерин талкуулады.

Moody’s Кыргыз Республикасынын суверендүү кредиттик рейтинги боюнча болжолду “Туруктуу” дегенден “Позитивдүү” дегенге өзгөрттү, узак мөөнөттүү рейтинг B3 деңгээлинде ырасталды.

Өлкөнүн экономикасы туруктуу өсүштү көрсөтүүдө: 2025-жылдын январь-июль айларында реалдуу ИДП 11,5%га өстү. 2025-жылдын май айында 700 млн АКШ доллары өлчөмүндө еврооблигациялардын дебюттук чыгарылышы ийгиликтүү ишке ашырылды, суроо-талап сунуштан үч эсе ашты, жүгүртүү мөөнөтү – 5 жыл, купондук ставка – 7,75%.

Тартылган каражаттар алтын сатып алууга (29 528 унция, болжол менен 10 млрд сом), депозиттерди жайгаштырууга (24 млрд сом) жана бюджеттик кредиттерди берүүгө (26 млрд сом, жылдык 6% менен) жумшалууда, кирешелер тышкы карызды тейлөө үчүн мамлекеттик карызды жеңилдетүү эсебине топтолууда.

Өлкөнүн бюджеттик системасы туруктуу бойдон калууда: 2024-жылдын республикалык бюджетинин профицити 34 млрд сомду түздү, 2025–2027-жылдарга болжол – тиешелүү түрдө 24 млрд, 1 млрд жана 41 млрд сом; 2025-жылдын консолидацияланган бюджети болжол менен 1 трлн сом деңгээлинде күтүлүүдө.

Кыргыз Республикасынын Финансы министрлиги Moody’s менен кызматташтыкты жогору баалайт жана кредиттик рейтингди бекемдөө жана инвестицияларды тартуу боюнча мындан аркы колдоо көрсөтүүсүнө ишеним артат.