Кыргызстан эт менен өзүн 85,7% гана камсыздайт

Кыргызстандын өзүндө өндүрүлгөн эт калктын керектөөсүн болжол менен 85,7% камсыздайт. Мындай маалыматтар айыл чарба жаныбарларын экспорттоого жаңы тыюу салуу тууралуу токтомдун долбооруна карата негиздеме-маалымкатта келтирилген.

2025-жылы республикада союу салмагында 261,9 миң тонна эт өндүрүлгөн. Бул 2024-жылга салыштырмалуу 4,5 миң тоннага көп.

Ошол эле учурда калктын санынын өсүшүнө байланыштуу этке болгон керектөө да көбөйүүдө.

Документте 2024-жылы этке болгон керектөө 309,4 миң тонна деп бааланса, 2025-жылы бул көрсөткүч 314,5 миң тоннага жеткени айтылат.

Негиздеме-маалымкатта келтирилген башка эсеп боюнча, 2025-жылы калктын этке болгон жылдык керектөөсү 303,2 миң тоннаны түзгөн. Өткөн жылдардан калган запастарды эске алуу менен өлкөнүн өздүк өндүрүшү менен камсыз болушу 85,7%ды түзгөн.

Долбоорду иштеп чыгуучулар өзүн-өзү камсыздоо мындай деңгээлде болуп турган шартта Кыргызстанда эттин ички рыногундагы сунуштун кыскаруу коркунучу жок тирүү малды экспорттоого олуттуу кошумча көлөмдөр иш жүзүндө жок экенин белгилешет.

2025-жылдын аягына карата Кыргызстанда 1 млн 857,7 миң баш бодо мал болгон. Бир жыл ичинде анын саны 28,9 миң башка көбөйгөн.

Кой-эчкинин саны 6 млн 318,7 миң башты, жылкынын саны 566,2 миңди түзгөн.

Малдын саны жана эт өндүрүшү өсүп жатканына карабастан, документте ички рыноктогу эттин көлөмү азырынча калкты жеткиликтүү баада туруктуу камсыз кылуу үчүн жетиштүү запастарды түзүүгө мүмкүндүк бербей жатканы белгиленет.

Ошол эле учурда коңшу мамлекеттер тарабынан Кыргызстандын тирүү малына болгон суроо-талап жогору бойдон калууда.

Дал ушул жагдайлардан улам долбоорду иштеп чыгуучулар бодо малды, кой, эчки жана жылкыны экспорттоого коюлган чектөөлөрдү дагы алты айга узартуу зарылдыгын негиздешет.