Улуттук банктын валюта интервенцияларынын көлөмү жыл башынан бери $893 млн түздү

2026-жылдын башынан бери Кыргызcтандын Улуттук банкы тарабынан жүргүзүлгөн валюталык интервенциялардын көлөмү 893,45 млн АКШ долларын түздү. Бул тууралуу Улуттук банктын төрагасынын орун басары Азат Козубеков билдирди.

Анын айтымында, интервенциялардын өсүшү тышкы соода активдүүлүгүнүн жогорулашы жана өлкөнүн акыркы жылдары жылына орточо 10% деңгээлде сакталган туруктуу экономикалык өсүшү менен байланыштуу.

«Экономиканын кеңейиши тышкы соода операцияларын тейлөө үчүн чет элдик валютага болгон суроо-талаптын өсүшү менен коштолот», – деди Козубеков.

Улуттук банкта белгилешкендей, интервенцияларды эл аралык резервдер менен салыштырып баалоо зарыл. Учурда алардын көлөмү 9 млрд АКШ долларынан ашат.

Абсолюттук көрсөткүчтөрдө операциялардын көлөмү өсүп жатканына карабастан, алардын деңгээли резервдерге салыштырмалуу орточо бойдон калууда. Бул өлкөнүн валюталык саясатынын жана каржы системасынын туруктуулугун көрсөтөт.