Кыргызстандын Тажикстан менен өз ара соодасы алты эсеге өстү

026-жылдын январь-май айларында Кыргызстандын Тажикстан менен болгон товар жүгүртүүсү 6,1 эсеге өсүп, 26,3 млн долларды түздү.

Сооданын негизги бөлүгүн кыргызстандык товарлардын экспорту түздү. Анын көлөмү 7,6 эсеге көбөйүп, 22,4 млн долларга жетти. Ал эми Тажикстандан импорт 2,8 эсеге өсүп, 4 млн долларды түздү.

Өзбекстан менен болгон соода жүгүртүү да кыйла өстү. Эки өлкө ортосундагы товар жүгүртүү 33,3% көбөйүп, 440,8 млн долларга жетти.

Мында Өзбекстандан импорттолгон товарлардын көлөмү 65,7% өсүп, 336,5 млн долларды түздү. Ал эми Кыргызстандан экспорт тескерисинче 18,3% азайып, 104,3 млн доллар болду.

Казакстан Борбор Азия өлкөлөрүнүн ичинен Кыргызстандын эң ири соода өнөктөшү бойдон калууда. Аны менен болгон товар жүгүртүү 721,4 млн долларды түзүп, өткөн жылдын ушул мезгилине салыштырмалуу 4% өстү.

Казакстанга экспорт 13,1% көбөйүп, 182,9 млн долларга жетсе, импорт 1,3% өсүп, 538,5 млн долларды түздү.

Мындан тышкары, Кыргызстандын Азербайжан менен болгон товар жүгүртүүсү дээрлик үч эсеге көбөйүп, 13,7 млн долларга жетти. Азербайжандан импорттолгон товарлардын көлөмү 10 эсеге жакын өсүп, 10,5 млн долларды түздү.

Маалыматтарды Кыргызстандын Улуттук статистика комитети келтирди.