Кыргызстанда 2027-жылга чейин жапайы чөптөрдү коргоо максатында мораторий киргизилди
Министрлер кабинети 2024-жылдын май айында токтомду кабыл алып, жаратылышта сейрек кездешкен жана экологиялык жактан маанилүү өсүмдүктөрдү пайдаланууга убактылуу тыюу салган. Бул тууралуу Жаратылыш министрлиги эске салат.
Бул токтом 2027-жылдын 1-январына чейин күчүндө болот.
Мораторий төмөнкү аракеттерге тиешелүү:
- өсүмдүктөрдү жыйноо,
- сатып алуу жана сатуу,
- ташуу,
- экспорттоо,
- чийки зат катары пайдалануу.
Тыюу салынган өсүмдүктөрдүн катарына төмөнкү сейрек түрлөр кирет:
- Макротомия (Macrotomia DC)
- Арнебия (Arnebia Forssk)
- Ясенец (Dictamnus L)
- Аконит (Aconitum L)
- Афлатун пиязы (Allium aflatunense B.Fedtsch)
- Родиола (Rhodiola L)
- Самарканд өчпөс гүлү (Helichrysum maracandicum)
- Ольга жөө желими (Lindelofia olgae)
- Узун мамычалуу жөө желим (Lindelofia macrostyla)
- Мамычалуу жөө желим (Lindelofia stylosa)
- Чимган жөө желими (Lindelofia tschimganica)
Бул чөптөр Кыргызстандын ар түрдүү аймактарында өсөт.
Маселен:
- Макротомия, арнебия жана афлатун пиязы — Жалал-Абад облусунун Чаткал жана Токтогул райондорунда;
- Ясенец — Чүй өрөөнүндө, Суусамырда жана Жалал-Абадда;
- Аконит жана родиола — Ысык-Көл облусунда;
- Ал эми калган түрлөрдү өлкөнүн ар башка аймактарынан жолуктурууга болот.
Бул өсүмдүктөр кеңири таралбагандыктан жана популяциясынын сакталышы экосистеманын туруктуулугу үчүн маанилүү болгондуктан, аларды жапайы шартта пайдаланууга чектөө киргизилди.