Бакыт Төрөбаев дыйкандарды суу үнөмдөгөн сугаруу системаларын кеңири колдонууга чакырды

Кыргыз Республикасынын Министрлер Кабинетинин Төрагасынын орун басары – Суу ресурстары, айыл чарба жана кайра иштетүү өнөр жайы министри Бакыт Төрөбаев дыйкандарды тамчылатып жана жамгырлатып сугаруу системаларын активдүү орнотууга чакырды.

Анын айтымында, климаттын өзгөрүшү, мөңгүлөрдүн эриши жана жаан-чачындын азайышы сууну үнөмдүү пайдаланууну талап кылууда. Айрыкча Ысык-Көл аймагында суунун азайышы кооптонууну жаратууда.

Өкмөт суу ресурстарын сактоо багытында ири иштерди жүргүзүп жатат: суу сактагычтар курулуп, каналдар тазаланып жана реконструкцияланууда. Каналдардагы жоготууларды азайтуу үчүн бетон полотно чыгаруучу завод да курулууда.

Учурда өлкөдө заманбап сугаруу системалары болгону 16 миң гектар жерге орнотулган. Өкмөт жыл сайын 30–40 миң гектарга жайылтып, 2030-жылга чейин 200 миң гектарды камтууну максат кылууда.

Министр дыйкандар үчүн каржылоонун жеткиликтүү булактары бар экенин белгилеп, мамлекеттик жана райондук фонддор, банктар, Дүйнөлүк банк долбоорлору, ошондой эле 2026-жылдан тарта өзүнчө жеңилдетилген кредиттик механизм ишке кирерин билдирди.

«Бул системалар сууну үнөмдөп гана койбостон, түшүмдү көбөйтүп, продукциянын сапатын жогорулатат. Натыйжада дыйкандардын кирешеси өсөт», – деди Бакыт Төрөбаев.