Ысык аба ырайы иттер үчүн сууктан да кооптуу

Ысык аба ырайы иттер үчүн сууктан да кооптуу. Бул тууралуу Россиянын кинология федерациясынын президенти Владимир Голубев билдирди.

Анын айтымында, жаныбарлардын ысып кетүүдөн каза болгон учурлары үшүп калууга караганда кыйла көп кездешет. Ысык уруу өтө тез өнүгүшү мүмкүн болгондуктан, ээлери анын алгачкы белгилерин байкабай калышы ыктымал.

Иттерде тер бездери аз болгондуктан, алардын организми негизинен дем алуусун тездетүү аркылуу муздайт. Бирок абанын температурасы жана нымдуулугу жогору болгондо бул механизм жетиштүү деңгээлде иштебей калат.

Өзгөчө күчүктөр, ири денелүү, ашыкча салмактагы жана өнөкөт оорулары бар иттер ысыкты оор көтөрүшөт. Ошондой эле кыска жүндүү жана жүнсүз породалар күнгө күйүп калышы мүмкүн.

Ысып кетүүнүн алгачкы белгилери: алсыроо, шалдыроо жана дем алуунун начарлашы. Көпчүлүк учурда ээлери мындай абалды сейилдөөдөн кийинки кадимки чарчоо катары кабыл алышат.

Катуу ысып кетүүнүн бир эле учуру жүрөктүн жана борбордук нерв системасынын иштешине олуттуу зыян келтириши мүмкүн.

Адис ысык күндөрү иттерди эртең менен же кечинде сейилдетүүнү, дайыма суу алып жүрүүнү жана жаныбарга салкын жерде болууга шарт түзүүнү сунуштайт. Ошондой эле итти жабык унаанын ичинде кыска убакытка да жалгыз калтырууга болбой турганын эскертет.