Бишкекте бир жылда 16 миңден ашык жолбун иттер кармалып, атылган

Бишкекте кароосуз калган жаныбарлардын санын жөнгө салуу боюнча иш-чаралар улантылууда. Бул тууралуу шаардын 2025-жылга карата социалдык-экономикалык өнүгүү программасынын аткарылышы боюнча отчетто айтылат.

Документте белгиленгендей, эпизоотикалык жана эпидемиологиялык коопсуздукту камсыз кылуу үй жаныбарларын жана канаттууларды кармоо эрежелерине ылайык жүргүзүлөт. Шаарда ошондой эле «Кумайык» программасы ишке ашырылууда. Ал кароосуз калган иттерди кармоо, стерилизациялоо, эмдөө жана кайра жашаган чөйрөсүнө кайтарууну карайт.

Ошол эле учурда программа жаныбарларды атуудан баш тартууну негизги шарт катары карайт. Бирок муниципалдык баш калкалоочу жайлардын жоктугунан улам «Тазалык» муниципалдык ишканасы бул ыкманы колдонуп келет.

Мамлекеттик санитардык-эпидемиологиялык көзөмөл борборунун маалыматына ылайык, 2015–2024-жылдары кутурмага каршы жардам алуу үчүн 27 455 адам кайрылган, алардын 21 701и ит тиштегенден кийин кайрылган. 2024-жылы 1 391 кайрылуу катталып, анын ичинен 949у балдар болгон.

Отчетто ошондой эле 2022-жылы Ош облусунда ит тиштегенден кийин адамда кутурма оорусу катталган учур эске салынган.

Белгиленгендей, 2021-жылы жаныбарларды атуу убактылуу токтотулган, бирок кийин шаар тургундарынын кайрылууларына байланыштуу кайра жандандырылган.

2025-жылдын жыйынтыгы боюнча «185» кызматына жана «Тазалык» ишканасынын диспетчердик кызматына кароосуз жаныбарларды кармоо боюнча 195 арыз түшүп, алардын баары аткарылган. Аткарылган иштердин көлөмү 8,6 млн сомду түзгөн.

Жалпысынан бир жыл ичинде Бишкекте 16 588 ит кармалып жана атылган. Салыштыруу үчүн, 2024-жылы бул көрсөткүч 14 378 жаныбарды түзгөн.