Кырчындагы 21 миң чарчы метрден ашык этнокомплекс үч айда курулду

Ысык-Көлдөгү Кырчын жайлоосунда жайгашкан «Көчмөндөр ааламы» этнокомплекси болжол менен үч айда курулду.

Эл аралык архитектура академиясынын профессору, «Асмат» ЖЧКсынын директору Мирлан Абдылдаевдин айтымында, курулуш иштери 7-июнда башталып, 2-сентябрда комплекс VI Дүйнөлүк көчмөндөр оюндарынын маданий-спорттук программасын расмий ачкан.

Имараттардын жалпы аянты 21 миң 643 чарчы метрди, ал эми комплекстин аймагы болжол менен 50 гектарды түзөт.

Архитектордун айтымында, негизги кыйынчылыктардын бири долбоорду ишке ашыруу учурунда анын концепциясын өзгөртүүгө туура келген. Алгач объектти түздөлгөн аймакка жайгаштыруу пландалган. Кийин архитектураны жердин учурдагы рельефине ылайыкташтырууга туура келген.

Натыйжада долбоорлоо жана курулуш иштери параллелдүү жүргүзүлгөн. Себеби документтерди стандарттуу тартипте даярдап, андан кийин курулушка киришүүгө убакыт жетишсиз болгон.

Абдылдаев мындай масштабдагы объект үчүн үч айлык мөөнөт өтө кыска болгонун белгиледи.

Ошол эле учурда архитекторлордун милдети аянтчаларды жана курулуштарды гана куруу менен чектелген эмес. Кырчындын мейкиндиги аркылуу көчмөн цивилизациясын кеңири көрсөтүү максаты коюлган. Башкача айтканда, көчмөндөрдүн маданияты боз үй жана аттар менен гана чектелбестен, шаарлар, чептер, кербен сарайлар, кол өнөрчүлүк борборлору жана чөйрөнү уюштуруунун татаал системасы аркылуу да чагылдырылган.