Маданият министри: Кыргызстандын эң чоң байлыгы — билимдүү, мекенчил жаштары
Маданият, маалымат жана жаштар саясаты министри Мирбек Мамбеталиев Кыргызстандын жаштарын куттуктады.
Куттуктоонун тексти:
Ардактуу жаштар!
Кымбаттуу достор!
Сиздерди Кыргыз Республикасынын Маданият, маалымат жана жаштар саясаты министрлигинин атынан жана жеке өзүмдүн атымдан 10-ноябрь — Кыргыз Республикасынын Жаштар күнү менен чын жүрөктөн куттуктайм!
Жаштык — адам өмүрүнүн эң маанилүү, изденүүгө, жаңы мүмкүнчүлүктөргө жана бийик максаттарга умтулууга толгон мезгили. Бул — инсандык көз караш калыптанып, билим менен тажрыйба топтолуп, келечекке карай чечкиндүү кадамдар жасалган өзгөчө доор.
Ар бир мамлекеттин келечеги анын жаш муунунун билимине, тарбиясына, мекенчилдигине жана жаратмандык дараметине түздөн-түз байланыштуу. Анткени өлкөнүн эртеңки өнүгүү багытын бүгүнкү жаштардын ой жүгүртүүсү, эмгеги, демилгеси жана жоопкерчиликтүү тандоосу аныктайт.
Кыргызстандын эң чоң байлыгы — билимдүү, мекенчил, демилгелүү жана өз өлкөсүнүн келечеги үчүн жоопкерчилик ала билген жаштары.
Бүгүнкү ааламдашуу жана технологиялык өзгөрүүлөр доорунда жаштардан терең билим, жаңычыл ой жүгүртүү, тынымсыз изденүү жана атаандаштыкка жөндөмдүүлүк талап кылынат. Ошол эле учурда улуттук нарк-насилди, эне тилди, тарыхый эс тутумду жана руханий баалуулуктарды сактоо ар бир муундун алдындагы ыйык милдет бойдон калууга тийиш.
Анткени чыныгы өнүгүү — заман талабына ылайык алдыга умтулуу менен улуттук өзгөчөлүктү сактоонун айкалышында.
Мекенге болгон сүйүү бийик сөздөр менен гана эмес, ак ниет эмгек, терең билим, жоопкерчиликтүү мамиле жана коомго кошкон реалдуу салым менен далилденет.
Мамлекетибизде жаштардын ар тараптуу өнүгүүсүнө, сапаттуу билим алуусуна, чыгармачылык жана интеллектуалдык дараметин ишке ашыруусуна, коомдук турмушка активдүү катышуусуна шарт түзүү мамлекеттик саясаттын маанилүү багыттарынын бири болуп саналат.
Кыргыз Республикасынын Маданият, маалымат жана жаштар саясаты министрлиги жаштардын демилгелерин колдоого, алардын мүмкүнчүлүктөрүн кеңейтүүгө, жарандык жоопкерчилигин жана мекенчилдик сезимин бекемдөөгө багытталган иштерди ырааттуу улантат.
Жаштарга түзүлгөн ар бир мүмкүнчүлүк — Кыргызстандын келечегине жасалган инвестиция.
Кымбаттуу жаштар!
Өз күчүңүздөргө ишениңиздер, билимге умтулуңуздар, убакытты баалап, алдыңыздарга бийик максаттарды коюңуздар. Кандай гана ийгиликке жетпеңиздер, адамдык асыл сапаттарды, улуттук жүзүңүздөрдү жана Мекен алдындагы жоопкерчилигиңиздерди эч качан унутпаңыздар.
Сиздердин ар бир жетишкендигиңиздер — Кыргызстандын өнүгүүсүнө кошулган салым, ар бир ийгилигиңиздер — элибиздин сыймыгы.
Бардыгыңыздарга чың ден соолук, бакубат жашоо, түгөнгүс дем-күч, бекем эрк жана алдыга койгон асыл максаттарыңыздарга жетүүнү каалайм!
Жолуңуздар ачык, келечегиңиздер кең, ийгилигиңиздер арбын болсун!
Жаштар күнүңүздөр менен!