Бишкекте "Музыка тилинде" долбоорунун концерти өттү
Бишкектеги Т. Сатылганов атындагы Кыргыз улуттук филармониясында эл аралык маданий долбоор "Музыка тилинде" юбилейлик концерти бешинчи жолу өткөрүлдү.
Бул иш-чара Россиянын Маданият министрлиги тарабынан уюштурулуп, Россотрудничествонун Кыргызстандагы өкүлчүлүгүнүн колдоосу менен ишке ашты. Маалыматтык колдоо – Кыргыз Республикасынын Маданият, маалымат, спорт жана жаштар саясаты министрлиги тарабынан камсыздалды.
Концерт Масленица майрамына жана Эл аралык аялдар күнүнө арналды. Кыргызстандын сахнасында Москва филармониясынын "Романтик-квартет" тобу, Россиянын эмгек сиңирген артисти, пианист Александр Покидченко, "Голос", "Три аккорда", "Романтика романса" телепроекттеринин катышуучусу, Россиянын эмгек сиңирген артисти Нина Шацкая, ошондой эле "Россия" ансамблинин солисттери, Россиянын эмгек сиңирген артисти Олеся Евстигнеева өнөр көрсөтүштү.
Концерттин жүрүшүндө Петр Чайковский, Николай Римский-Корсаков, Дмитрий Шостакович, Микаэл Таривердиевдин чыгармалары, орус романс жана элдик обондор жаңырды. Программанын өзгөчөлүгү катары кыргыз композитору Атай Огонбаевдин "Маш ботой" чыгармасы комузчу Даниэл Маамытов жана "Россия" ансамблинин квартети тарабынан аткарылды. Кечени Бишкектеги Орус үйүнүн маданий долбоорлорунун куратору Игорь Воронцов алып барды.
Бул долбоордун уникалдуулугу – бир сахнада бир нече атактуу россиялык музыкалык топтор жана аткаруучулар чогуу өнөр көрсөткөндүгүндө. Бишкек шаарынын тургундары жана меймандары орус музыкалык маданиятынын мыкты үлгүлөрү менен таанышып, классикалык, романс, джаз жана элдик музыка дүйнөсүнө сүңгүп киришти.
Классикалык музыканы Москва филармониясынын "Романтик-квартет" тобу жана Россиянын эмгек сиңирген артисти, пианист Александр Покидченко сунуштады. Ал эми Кыргызстанда биринчи жолу Россиянын эмгек сиңирген артисти, белгилүү телепроекттердин катышуучусу Нина Шацкая сахнага чыкты.
Ошондой эле көрүүчүлөр орус элдик музыкасын жана инструменталдык өнөрдү чагылдырган көрүнүктүү топтордун бири – Россиянын эмгек сиңирген артисти Дмитрий Дмитриенко жетекчилик кылган "Россия" ансамблинин инструменталдык жана вокалдык квартеттери менен таанышышты. Алар элдик жана фолк-поп музыкасынын көрүнүктүү аткаруучуларынын бири, Россиянын эмгек сиңирген артисти Олеся Евстигнеева менен биргеликте сахнага чыгышты.