Чүй облусунда ишенип берилген мүлктү ыйгарып алуу жана коротуу фактысы боюнча шектелген жаран кармалды

2026-жылдын 6-февралында Аламүдүн райондук ички иштер бөлүмүнө “К.Ж.” фермердик дыйкан чарбасынын өкүлү, М.Б. аттуу жаран кайрылып, 1998-жылы туулган Ж.Э. аттуу жаранга чара көрүп берүүнү суранды. Ал арызында, Ж.Э. 2025-жылдын октябрь айында чарбада малчы болуп иштеп, 50 баш музоонун багылуусу жана жайылтылышын 2026-жылдын апрель айына чейин өзүнө милдет алган.

Бирок 2026-жылдын январь айында аталган жаран өз алдынча малды сатып жиберип жана түшкөн каражатты онлайн-казино оюндарында ысырап кылган. Материалдык зыяндын суммасы 3 700 000 сомду түзгөн.

Бул факт боюнча Кыргыз Республикасынын Кылмыш-жаза кодексинин 210-беренесине ((Ишенип берилген мүлктү ыйгарып алуу жана коротуу) ылайык кылмыш иши козголду.

Кыргыз Республикасынын Кылмыш-жаза-процестик кодексинин 96-беренесине ылайык, 1998-жылы туулган Ж.Э. аталган кылмышты жасоого шектелип кармалып, убактылуу кармоочу жайга киргизилди.

Кылмыш ишинин тергөө иштери уланууда.