Чүй облусунда ишенип берилген мүлктү ыйгарып алуу жана коротуу фактысы боюнча чет мамлекеттин жараны кармалды

2026-жылдын 5-январында Чүй облусунун Ички иштер башкы башкармалыгына ЗСАО «Ингосстрах» компаниясынын башкармалыгынын өкүлү Ы.Н. кайрылып, «Д.А.Р.» жеке ишкерлигинин кызматкерлерине карата чара көрүү өтүнүчү менен арыз берген.

Арызда 2025-жылдын апрель айынан декабрь айына чейинки аралыкта аталган жеке ишкерликтин айрым кызматкерлери ОСАГО камсыздандыруу полистерин сатуу учурунда ишенип берилген акча каражаттарын ыйгарып алып, коротуп жиберишкендиги жана алардын жалпы суммасы 7 085 708 (жети миллион сексен беш миң жети жүз сегиз) сомду түзгөндүгү, андан соң жашырынып кетишкени көрсөтүлгөн.

Бул факты боюнча Кыргыз Республикасынын КЖКнын 210-беренеси (Ишенип берилген мүлктү ыйгарып алуу жана коротуу) боюнча кылмыш иши козголгон.

Жүргүзүлгөн ыкчам-иликтөө иш-чараларынын жүрүшүндө милиция кызматкерлери тарабынан аталган кылмышка шектелген адам аныкталган. Ал 1985-жылы туулган, чет мамлекеттин жараны А.А. болуп чыккан. Шектүү Кыргыз Республикасынын КЖПКнын 96-беренесине ылайык кармалып, убактылуу кармоо жайына киргизилген.

Учурда кылмыш иши боюнча болгон окуянын бардык жагдайларын, ошондой эле мүмкүн болгон шериктештерин аныктоого багытталган тергөө аракеттери улантылууда.