Жалал-Абаддын аймагына эки асма жол куруу долбоору талкууланды

Президенттин Жалал-Абад облусундагы ыйгарым укуктуу өкүлү Тилек Текебаев Кытайдын “Кытай Эл аралык экономикасы-Цзянсу провинциясынын техникалык тобунун” директорунун орун басары Юань Ган баштаган курам менен жолугушту.

Облустагы өкүлчүлүктөн кабарлашкандай, тараптар инвестициялык долбоорлорду ишке ашырууну талкуулады.

Тилек Текебаев облустун туризм тармагын өнүктүрүү максатында, Базар-Коргон районунун Арстанбап-Ата айыл аймагындагы “Кичи шаркыратма-Жаңы-Базар” участкасындагы 2 чакырым аралыгына жана Жалал-Абад шаарынын Курорт аймагына асма жол куруу долбоорун сунуштады.

Ошондой эле, жолугушууда Таш-Көмүр шаарында цемент заводун куруу жана Жалал-Абад шаарынын таштанды таштоочу жайындагы калдыктарды кайра иштетүү менен электр энергиясын өндүрүү долбоорлорун ишке ашырууну 2025-2026-жылдарга карата баштоо тууралуу сөз болду.

Жыйынтыгы менен тараптар өз ара кызматташуу боюнча меморондумга кол коюшту.