2030-жылга карата 520 млн адам ачарчылыкка дуушар болушу мүмкүн – ФАО

2030-жылга карата дүйнөдө 510-520 млн адам ачарчылыкка дуушар болушу мүмкүн. Бул тууралуу БУУнун Азык-түлүк жана айыл чарба уюмунун (ФАО) Орусия менен байланыштар боюнча бөлүмүнүн жетекчиси Олег Кобяков билдирди.

Жакынкы Чыгыштагы кырдаал курчуганга чейин бул көрсөткүч болжол менен 503 млн адамды түзгөн.

ФАОнун жаңыланган баалоосунда энергетикага жана жер семирткичтерге баалардын өсүшү аркылуу кризистин азык-түлүк баасына тийгизген таасири эске алынган. Уюмдун расмий болжолу боюнча, 2030-жылга карата ачарчылыкка дуушар болгондордун саны 510-520 млн адамды түзүшү мүмкүн.

Ошол эле учурда эсептөөлөргө айрым кошумча тобокелдиктер, анын ичинде аба ырайынын кескин өзгөрүшү камтылган эмес. Алар азык-түлүк коопсуздугуна байланыштуу кырдаалды дагы татаалдаштырышы мүмкүн.

ФАОнун маалыматына караганда, Жакынкы Чыгыштагы кризистин кесепеттери күйүүчү майдын, жер семирткичтердин жана азык-түлүк өндүрүшүнүн кымбатташы аркылуу башка өлкөлөргө да жайылышы мүмкүн.

Уюмдун маалыматы боюнча, 2025-жылы дүйнөдө 608-696 млн адам ачарчылыкка дуушар болгон.