Кыргызстан менен Германия экономикалык кызматташтыкты бекемдөөдө

Чолпон-Ата шаарында 26-августта «Кыргызстандагы Германия экономикасынын күнү» аттуу кыргыз-герман бизнес-форуму жана кыргыз-герман Ишкер кеңешинин төртүнчү жыйыны өттү. Бул тууралуу Экономика жана коммерция министрлигинен кабарлашты.

Иш-чараларга КРнын экономика жана коммерция министри Бакыт Сыдыков катышты.

Форум мамлекеттик органдардын өкүлдөрүн, ишкерлерди жана Кыргызстан менен Германиянын бизнес-ассоциацияларын бириктирип, эки тараптуу өз ара кызматташтыктын келечегин талкуулай турган маанилүү аянтчага айланды.

Иш-чаранын алкагында:

• экспорттук потенциалды кеңейтүү,
• ишкердик кызматташтыкты өнүктүрүү,
• биргелешкен энергетикалык долбоорлорду ишке ашыруу,
• жаңы экономикалык багыттарды илгерилетүү маселелерин камтыган панелдик сессиялар өттү.

Бизнес-форум менен Ишкер кеңешинин жыйыны Кыргызстан менен Германиянын өнөктөштүк мамилелеринин жогорку деңгээлин дагы бир жолу тастыктап, тараптардын соода-экономикалык байланыштарды чыңдоо боюнча активдүү кызматташтыкты улантуу ниетин көрсөттү.