Баш байге автоунаа: Жалал-Абадда жылдын мыкты мугалими аныкталат
президенттин Жалал-Абад облусундагы өкүлчүлүгү
16 ноябрь

Баш байге автоунаа: Жалал-Абадда жылдын мыкты мугалими аныкталат

Жалал-Абад облусунда “Жылдын мыкты мугалими” кароо-сынагы өткөрүлүүдө. Бул тууралуу облустагы өкүлчүлүктөн кабарлашты. 

Сынак мугалимдердин кесиптик чеберчилигин жогорулатуу, билим берүү тармагындагы мыкты тажрыйбаларды жайылтуу жана чыгармачыл, демилгелүү педагогдорду колдоо максатын көздөйт.

Кароо-сынак 10 предмет боюнча жарыяланып, ага облустун бардык район, шаарларынан жалпы 101 мугалим катышууда. Алар төмөнкү предметтер боюнча күч сынашат:

  • Кыргыз тили жана адабияты;
  • Орус тили жана адабияты;
  • Англис тили;
  • Математика;
  • Физика;
  • Информатика;
  • Химия;
  • География;
  • Биология;
  • Аскерге чейинки даярдык.

Кыргыз Республикасынын Агартуу министрлигине караштуу Билим берүүнүн сапатын өнүктүрүү департаменти тарабынан 14-ноябрда сынактын биринчи баскычы — тестирлөө өткөрүлүүдө.

Катышуучулар компьютер аркылуу өз предметтери боюнча тест тапшырышат. Анын жыйынтыгы менен кийинки баскычка өткөн мугалимдер аныкталат.

Кароо-сынак жобого ылайык үч баскычтан турат: тестирлөө, мастер-класс жана сабак өтүү. Экинчи жана үчүнчү баскычтар Манас шаарындагы Ж. Болотов атындагы №21 жалпы билим берүүчү орто мектебинин базасында өткөрүлөт.

Сынактын баш байгесине Chevrolet Spark үлгүсүндөгү автоунаа коюлган. Жыйынтыгында Гран-при, биринчи, экинчи жана эки үчүнчү орундун ээлери болуп, жалпы беш мугалим баалуу белектер менен сыйланат. Мындан тышкары, алдыңкы катышуучулар үчүн кошумча сыйлыктар да каралган.

Кароо-сынак 14-18-ноябрь күндөрү өткөрүлөт.