Кара-Көл шаарынын башкы планы даярдалууда 

Жалал-Абад облусундагы Кара-Көл шаарынын башкы планы даярдалууда. Ал үчүн жергиликтүү бюджеттен 3,5 миллион сом жумшалууда. Бул тууралуу шаардык мэриянын басма сөз кызматынан билдиришти. 

Маалыматка ылайык, Кара-Көл шаарынын мэри Нуртилек Орозбаев жана тийиштүү мекеме-ишканалардын жетекчилери шаардын 2045-жылга чейинки даярдалып жаткан башкы планын талкуулашты.

Шаарды кеңейтүүдө экономикалык, инфратүзүмдүк шарттарды эске алуу зарылдыгын белгилешти.

Даярдалып жаткан башкы планга ылайык, Кара-Көл шаарынын аянты жанаша жайгашкан айыл аймактардын Жаз-Кечүү, Кайынды, Жээн-Кыштоо жана Чоң-Таш эсебинен 1858.97 гектар кошулат.

Анын ичинде өндүрүштүк аймак, турак-жай курууга багытталган жерлер такталып, социалдык-экономикалык өнүгүү программасы иштелип чыгат.